Satira elettorale 2013, il Paese di Pulcinella. Dialogo tra due compari

 ’U paisi ’i Puricinella (Il paese di Pulcinella)

– Cumpari, pe’ ’sta crisi a cu’ votati? –          

– ’O fìgghju ’i me’ cumpari Sarvaturi! –       

– Ma se lu votu a chidu vu’ ’nci dati,          

restamu sempri cu’ grandi sventuri.

E’ propriu veru allora ca jè jella:

chistu è ’u paisi di Puricinella! –

 

– ’Na domandina ’na vota mi fici                 

cumpari Turi a lu nostru Comuni,

ca lu sapiti comu cca si dici:

“cu’ l’ògghju s’apri mègghju lu portuni!” –

– Era vostru dirittu, chista è bella:

viva ’u paisi di Puricinella! –

 

– Lu sangu a goccia a goccia ’ndi sucaru       

certi vampiri senza sentimentu,

lu postu ’e povaredi ’nci ’rrobbaru:

cumpari, pe’ votari stati attentu.

Simu ’ncappati ’nda ’na brutta stella,

pecchì cumanda cca Puricinella! –

 

– ’U peju è arretu, caru me’ cumpari,                 

pe’ figghj calabrisi non c’è postu;

cu’ si vindìu l’onuri pe’ dinari

a nnui dassàu lu fumu e no’ l’arrostu.

A vu’ no’ manca certu la favella:

viva pe’ sempri lu Puricinella! –

 

– Cumpari, a lu dilùviu non c’è onestu:                 

puru li stronzi a galla sempri jìru,

l’Italia si mangiaru e tuttu ’u restu,

’a panza a’ facci nostra si linchìru.

Nenti c’è da sarvari è sempri jella,

pecchì no’ mori mai Puricinella! –

 

– Ragiuni vu’ ’ndaviti è propriu veru,

non c’è cchjù leggi e l’omu resta sulu:

non vàju pemmu votu, su’ sinceru,

e me’ cumpari la pìgghja ’ndo c…

Falla comu la voi, non è storiella:

simu ’u paisi di Puricinella!